Cynghorwyr yn edrych ar effaith eu Hymchwiliad Craffu

Os oes angen gwybodaeth bellach arnoch mewn perthynas â’r blog hwn neu unrhyw fformatau amgen e.e. Print bras etc. ffoniwch 01792 637732 neu e-bostiwch craffu@abertawe.gov.uk

Cyfarfu’r Panel Ymchwiliad Craffu’n ddiweddar i edrych ar effaith a chynnydd yr argymhellion a wnaed fel rhan o’r Ymchwiliad Craffu Cydraddoldebau.

Roedd Aelodau’r Panel yn falch o glywed fod Cynllun Cydraddoldeb Strategol newydd ar gyfer 2020/24 wedi’i ddatblygu a bod Bwrdd Cydraddoldeb Strategol a Chenedlaethau’r Dyfodol newydd wedi’i sefydlu, a chanddo gyfrifoldeb allweddol am gamau gweithredu ac argymhellion o fewn y Cynllun Cydraddoldeb Strategol a’r Ymchwiliad Craffu.

Roedd y Panel yn croesawu’r ffaith bod Cyngor Abertawe a holl aelodau’r Bwrdd Gwasanaethau Cyhoeddus wedi llofnodi eu bwriad i ddod yn Ddinas Hawliau Dynol. Roedd Aelodau’r Panel yn falch o glywed yr ymgysylltwyd â nifer mawr o bobl eisoes, gan gynnwys grwpiau cymunedol.

Clywodd y Panel, er mwyn cyflawni’r uchelgais o ddod yn Ddinas Hawliau Dynol, y bydd angen i hawliau dynol fod yn sylfaen i gynllunio a chyflwyno gwasanaethau. Sefydlwyd pwyllgor llywio i hyrwyddo’r nod hwn.

Mewn ymateb i’r argymhelliad i wella data am ein gweithlu, sefydlwyd Gr?p Cydraddoldeb y Gweithlu newydd i gefnogi’r gwaith o ddarparu atebion cydraddoldeb, er mwyn cefnogi’r cyngor i fod yn gyflogwr rhagorol.

Roedd Aelodau’r Panel yn fodlon ar y gwaith a wnaed yn gyffredinol mewn perthynas ag 18 o argymhellion yr Ymchwiliad, a chydnabuwyd bod pandemig COVID-19 yn dal i gyflwyno heriau sylweddol i’r cyngor, a bod nifer o swyddogion wedi gorfod newid eu ffocws i sicrhau bod gwasanaethau’r cyngor yn cael eu cynnal.

Clywodd y Panel fod saith o’r argymhellion bellach wedi’u cwblhau ac y gwnaed cynnydd da gyda’r argymhellion hynny sy’n weddill.

Cytunodd y Panel i ddod â’u cyfranogaeth ddilynol gyda’r ymchwiliad i ben gan eu bod yn fodlon ar y cynnydd da a wnaed gyda’r holl argymhellion. Fodd bynnag, bydd y Panel yn crybwyll hyn i Bwyllgor y Rhaglen Graffu i awgrymu y dylid creu Gweithgor i ymchwilio i’r mater o gydgynhyrchu a sut mae’n datblygu.

Roedd y Panel yn falch o’r effaith gadarnhaol y mae’r ymchwiliad, ac ymrwymiad Aelod y Cabinet dros Gymunedau Gwell a swyddogion iddo, wedi’i chael i helpu i symud yr agenda bwysig hon yn ei blaen yn Abertawe.

Cliciwch yma i weld yr holl fanylion a drafodwyd yn y cyfarfod hwn.